Yá ta bien

Nun fexo falta esperar al mes de setiembre pa ver outra vez queimando'l monte de La Viliel.la, na Reserva Natural Integral de Muniel.los. El primer día d'esti mes d'abril, alredor de las 9 la tarde, volvían los vecinos de La Viliel.la a ver ya goler las consecuencias de que haiga elementos (niégome a chamalu persona) ensin sentíu común -pa tenelu, primeiru tien qu'haber celebru na cabeza-. Ya, cumu las outras veces, el ritual acostumáu: l.lume nas últimas horas de la tarde ou primeras de la nueite, las brigadas movilizadas pol pueblu, el soníu de los helicópteros durante tou'l l.lunes, el golor tristemente familiar del fumu por tóla parroquia ya unos días dispuéis, la Guardia Civil tomando los datos de la xente que taba no l.lugar esi día ya fayendo las priguntas protocolarias.

Granda L'Antigua

 Quien prendióu esta vez yera ensin duda un bon conocedor del terrén. El l.lume tuvo dous focos diferentes ya estremaos unos 100 m en l.linia reuta (peru cerca de 600 pol camín que xune las duas ouriel.las del regueiru La Porquera): el fondu la Granda L'Antigua ya  el fondu del conocíu cumu El Sel.lón. El camín que va desde La Viliel.la al primeiru d'el.los, anque foi rozáu dacuandu, hai anos que ta zarráu pola maleza en muitos sitios (salvu onde queimóu l'anu pasáu), al dexase de gadañar los praos a los que va. L'outru camín que, desde la ponte de La Baxancada, va  a El Sel.lón (en realidá, una pista abierta pa sacar la madera que los vecinos de La Viliel.la vendienon pa costear la instalación de la l.luz hacia 1950), ta pior entovía. Naide que nun tuviera unos bonos conocimientos d'esos caminos, ya menos tando cerca la nueite, sería capaz de metese por el.los no estáu que tán.

El Sel.lón

Nun yía la necesidá de pastos la causa'l l.lume nos montes de La Viliel.la, cumu puede asoceder n'outros l.lugares que tamién queimanon esta vez ya outras. Nin tampoucu esti incendiariu ta tontu ou l.loucu -sabe mui bien ónde ya cúmu dar fueu pa faer el mayor estrozu posible ensin mancase-. Sólu dúas desplicaciones tienen sentíu pa los incendios del monte de La Viliel.la: la caza (furtiva, por supuestu, yá que l.legalmente nun la permite la L.lei de la Reserva de Muniel.los) ou venganzas escontra l'alministración por causas que sólu esi cobarde sabe. Cumu si la Naturaleza ya los vecinos tuvieran la culpa de los sous problemas ya complexos.

Yá dexéi muitas veces, nesti blogue ya n'outros, la mia opinión sobre estu. De tolas maneras, sigo ensin tener claru cuála yía la política de prevención d'incendios del Principáu, no que cinca al monte de La Viliel.la, esceutu prohibir casi tou, ensin que paeza valir pa gran cousa. Cáusame tamién cierta estrañeza (anque relativa, conociendo'l personaxe) que, en tólos incendios rexistraos no monte de La Viliel.la, el responsable de la RNI de Muniel.los trate de quitá-l.lys importancia, cumu salióu publicáu nestos días no diariu La Nueva España, entre outros. Yía ciertu que nun se vióu afeutáu'l monte de Muniel.los, nin el d'El Teixu (éste tamién en términos de La Viliel.la) -los dous catalogaos cumu Zona Núcleu de la Reserva-, ya que'l terrén queimáu yera, sobretou, granda ya non arboláu. Peru paez olvidar el responsable que la flora ya la fauna quedan seriamente afeutadas y que yía una zona de cría ya tránsitu d'osos, entre outras especies, ensin falar de las consecuencias pa la salú humana, la apicultura de la zona ya outros asuntos non menores. Amás, nestas dúas zonas hai restos arqueolóxicos de la época romana. Peru claru, ¿qu'importancia tien esu, si los turistas vienen a ver sólu las l.lagunas ya nun van ver outros animales que dalgún corzu paciendo en Las Tablizas? ¿Qué más da que los caminos del monte de La Viliel.la tean pior qu'el monte ya las brigadas nun sían capaces a pasar por el.los pa tratar d'estinguir ou controlar el l.lume, ya arriesguen la sua vida, primeiru por causa d'un delincuente ya l.lueu pola política medioambiental asturiana (si tala cousa esiste)? ¿Qué-l.ly importa a esti responsable el mediu natural, si nun yía pa usalu pa vender los sous  l.libros de rutas, entre outros intereses?
Esu sí, nun tien reparu n'almitir que "La zona en la que se produjo el incendio no permite el acceso de vehículos" (según la nota del Principáu del día 3 d'abril). ¿Nunca-l.ly dióu por priguntase por qué nun pueden pasar los vehículos de bombeiros ya guardería, pa poné-l.ly remediu a esa situación? Igual nun sabe que pola mayoría d'esos caminos antes pasaba ensin problemas un carru ya en dalgunos sitios podían cruciase dous...

En 20 meses, más d'80 hectáreas de la nuesa Naturaleza echadas a perder pa anos por un indeseable, ensin cuntar las pérdidas de vidas animales.  Más d'850.000 metros cuadraos de terrén arrasaos por un criminal que yá repitióu trés veces. Ya, hasta agora, houbo suerte de que nenguna persona morrióu cumu asocedióu días anantias en Castrelo do Val (Ourense). Espero, sinceramente, que si tal suxetu vuelve a prender l.lume, quede atrapáu ensin poder escapar pa poder alcontralu al día siguiente ya quitar cualaquier duda. Nun se perdería gran cousa ya tous saldríemos ganando.