sábado, 9 de mayo de 2015

... ya la l.luz féxose.

(Continuación deseada anque un poucu inesperada de la entrada d'hai trés años "Hágase la luz...").

Aparentemente nun fexo falta la intervención de nenguna divinidá, anque yá yera la única posibilidá que nos quedaba ensin prebar... Esti vienres 8 de mayu del 2015, a las 21:45 horas ya dispuéis d'unos trabachos qu'entamanon tamién un día 8 del pasáu mes d'abril, realizóse unu de los suanos que los vecinos de La Viliel.la veníemos pidiendo desde hai yá 29 años. Por fin, las cais del l.lugar disponen d'al.lumáu públicu. Un total de 18 farolas faen que'l tránsitu de personas pol pueblu sía muitu más fácil ya más seguru nas horas nas que la escuridá yera la reina. Ya tamién una manera de que se sepa óu ta La Viliel.la pola nueite.

Elementos estraños nos postes (Fotu: Nieves De Lama)

Nun foi cenciel.lu'l trayeutu hasta esti puntu. Desque en 1986 punxeran los postes pa la l.luz de las casas, nun se dexó de pidir al Ayuntamientu (con resultaos de sobra conocidos) ya al Principáu (véase La carta a los Reyes Magos) vistu'l dispreciu cono que'l que fora alcalde del conceichu desde 1983 hasta 2007 trataba a los vecinos de La Viliel.la nésti ya n'outros asuntos.
Poucu amichoraran las cousas cono alcalde que tuvo desde 2007 hasta 2011. Yía verdá que nos recibióu ya escuitóu las nuesas piticiones. Peru nun ye menos verdá que nun tuviemos más noticias del al.lumáu nin d'outras cousas que faláramos con él. Nin siquiera houbo respuesta a una carta qu'ésti qu'escribe-l.ly mandóu n'agostu de 2009, dous anos dispuéis de la entrevista que tuviemos no sóu despachu.
De la respuesta del Principáu, ¿pa qué falar más, si yá se dixo tou nesta entrada del añu 2011 (Chapuzas y mentiras Principado, S.A. (1))?

Conos nuevos ya estraños aires qu'empezanon a circular pol Ayuntamientu desde'l 2011. aneciamos outra vez. Entrevistas nel ayuntamientu ya, nos últimos tiempos, priguntas na emisora Onda Cero, na programación local que tien en Cangas del Narcea, al traviés de la sua páxina nas redes sociales (CangasdelNarcea EnlaOnda). Pa los que teais interesaos, éstos son los enl.laces a las entrugas ya las respuestas del alcalde. Recordái que tán entemecidas con outros asuntos:
- 28 de febreru del 2012  (Respuestas del alcalde)
- Priguntas del 31 d'outubre del 2014 ya las respuestas.
- Priguntas del 4 de marzu del 2015 ya las respuestas.

Un nuevu l.luceiru na nueite cabrera (Fotu: Nieves De Lama)
Peru, al pesar del contentu por ver la l.luz, nun hai forma humana qu'en La Viliel.la los l.labores de los organismos públicos nun tengan dalgún tropiezu. Cuandu dienon por terminada la instalación, un vecín de las poucas casas que tán permanentemente habitadas dióse cuenta que na sua puerta nun-l.ly punxeran una farola no poste que tien averáu a la casa. La causa d'esi olvidu, digna de figurar nas antoloxías del disparate: dixénon-l.ly que nesi poste nun yiba nenguna farola “porque la construcción qu'al.lumaría esa farola yera un parreiru”. Nun paez que'l responsable de faer el proyeutu pasiara muitu pol pueblu. Tamién puede ser que nun sepa distinguir un parreiru pa la yerba d'una casa pa vivir. Nesi casu, prestaríame saber cúmu son las casas no l.lugar onde vive esi "inxenieiru".

Nun yía l'al.lumáu la última oubra que queda por faer en La Viliel.la. Quedan pendientes muitas outras, peru ésta yera la más esperada polo muitu que se fixo de rogar. Cumu pasa en tólos sitios, non tol mundu punxo'l mesmu interés, nin nesta nin n'outras cousas (ya del.los vecinos, nengunu).

Norabona a quienes peleanon, d'una ou d'outra miente, por qu'esti suanu se fixera realidá ya al alcalde del conceichu por cumplir la sua promesa. Ya qu'esta oubra la esfrutemos por muitos años.