Fai yá dalgún tiempu que tenía pensáu escribir un blogue basáu no l.lugar onde nací: La Viliel.la, parroquia de L.larón, conceichu de Cangas del Narcea. N'él yiba falar de los dous l.lugares que forman la parroquia (L.larón ya La Viliel.la), porque nun yía posible mentar un pueblu ensin que salga l'outru, pola prosimidá entre el.los ya'l parentescu entre la xente d'ambos. L'entornu xeográficu ya históricu, los vezos ya costumes (perdíos pa siempre muitos d'el.los, esqueicíos outros tantos), las personas d'antes ya d'agora, los sous problemas viechos ya nuevos, los nomes de los l.lugares (tamién casi esqueicíos), la l.lingua (tan dispreciada durante muitos años), serían dalgunos de los temas protagonistas. Peru nun atoupaba'l momentu pa poneme a el.lu.
Animárame tamién ver que n'outros l.lugares de la redolada había personas con intenciones asemechadas a las mías, ya'l contautu con dalgunas d'esas personas fixo qu'esta idea fora tomando forma. Circustancias familiares mui difíciles fixénonme abandonar el proyeutu ya, al retomalu, penséi: ¿Qué vou poner que nun se sepa yá? ¿Cúmu vou falar de muitas cousas que yá tán escritas ya muitu bien desplicadas n'outros blogues? ¿Merez la pena cansar la xente repitiéndo-l.ly aiquí lu que de seguru yá l.leenon varias veces?
Ya, amás, ¿cúmu podía you
competir cona seriedá de
Moal, Puerta de Muniellos, la facilidá pa sacar temas de
Ibias: El Lejano Oeste, l'entusiasmu mozu d'
Ibias: parroquia de Tormaleo, la más que bona esposición de rutas d'
Alto Sil: las montañas y sus pueblos, el valor pa denunciar los problemas mediuambientales de
Tsobu de Laciana, ou las documentadas entradas sobre la Naturaleza de
Degaña Natural, ya con outros escelentes blogues de la zona? Dispuéis de l.leelos nestos dous cabeiros años, paecíame que, al pesar de la regueirada de conocimientos qu'aportan tous ya cada ún d'el.los, nun conseguía "contaxame" nin de las ideas nin de la súa sabiduría.
D'esta vez vou intentalu. Ya cumu dicen por aiquí, "Si sal con barba, Santu Antón, ya si non, la Purisima Conceción". Ya nun tará feitu pa contentar a naide, nin siquier a mi mesmu. Consuélame pensar que cousas piores, con seguridá, tarán escritas, vistas ya oyídas.
El nome del blogue refierse al nomatu (cabreiros) que-l.lys daban los vecinos de los pueblos cercanos a los de L.larón ya La Viliel.la pola dedicación mayoritaria, anque non única, al ganáu caprinu. Nun siempre foi un nome neutral ya estimáu. Valga esti nome cumu homenaxe a tous aquel.los que, na parroquia de L.larón, dedicanon la súa vida, ou parte d'el.la, a esti l.labor.
Nun vei ser ésti un blogue n'asturianu, anque del.las entradas asina tarán escritas. Peru las primeras palabras d'él nun podían tar n'outra l.lingua que nun fora la que, con michor ou pior xeitu, fala ya escribe quien vei faelu, ya que sintióu ya siente falar entovía. Nuna l.lingua que foi siempre de de la xente d'aiquí, hasta que l.leganon tiempos nos que falala nun yera bien vistu pola "xente de bien" nin polos "intelixentes", nin yera "modernu" nin "práuticu". Tiempos ya disprecios qu'entovía l.legan a güei, anque a esa sebe feita de disprecios ya insultos quedan-l.ly yá poucos bárganos ya los qu'entovía tán en pía tán sueltos ya podres.
Quédame namás dar las gracias a Jose de Mingo, María del Roxo y María Jesús por animame a faer el blogue. Ya a outros muitos amigos que tamién lu fixenon. ¡Nun saben qué poucu van deprender aiquí!
Ya l'agradecimientu más especial a Manolo ya Flora, ensin los cuales nun taría you nesti planeta chamáu Tierra.
Tais na vuesa casa. Bienveníos.