Una reina, dous reis, cuatru ases,...

Que nun piense naide, al ver la fotu de cabecera, que tóu dexándome arrastrar agora pol viciu del xuegu, más que nada porque entovía nun lu dexéi. Tou tien desplicación. Nos últimos tiempos, esti blogue ta más veces por fuera del País Cabreiru que falando d'él. Peru hai ocasiones nas que merez la pena nun atase a las l.lindes xeográficas, y ésta yía una de las que tán nesa categoría, por dereitu propiu.

Nun tengo la menor duda de que, si tuviera que nomar a los reis de las escursiones pola zona del Suroucidente d'Asturias, el Noroeste l.lionés ya una parte del este lucense, éstos serían Julio Álvarez Rubio (autor del blogue Noroeste leonés, con muitas ya escelentes fotos de L.laciana ya Babia) ya Alberto Álvarez Ruiz. Peru estu taría incompletu si nun tuvieran acompañaos d'una reina, María del Roxo (Ibias: El Lejano Oeste). Cada unu d'el.los, al sou xeitu, mediante blogues ya l.libros pa esfrute de los que nun tamos pol l.labor d'andar ya cansar, dannos a conocer el patrimoniu (natural, etnográficu, l.lingüísticu, artísticu...) de la nuesa zona galaicoasturl.lionesa, ya ofrécennos tamién una bona sida pa yir a conocer esos l.lugares personalmente.

Esta vez, tocóu-l.ly'l turnu al conceichu d'Ayande, que no 2011 sufrióu una de las piores catástrofes medioambientales que se recuerdan, conos incendios del mes d'outubre. La guía que ta recién editada, Allande. Guía completa yía un bon homenaxe a tou'l sou patrimoniu ya tien de ser un estímulu pa conservar el que resistióu ya recuperar el queimáu, ya ta a la venta, polo menos, en La Tienda Verde (Madrid), na l.librería Cervantes (Uviéu) ya na l.lbrería Proteo (Málaga).

Esti (pol momentu...) últimu trabachu completa un póquer de ases indispensable pa que esta parte de Lugo, L.lión ya Asturias nun sía sólu un nome nos mapas, xunto a Ibias, guía completa, Alto Sil. 40 rutas a pie (Volumen 1) ya Ancares en coche y a pie. Peru nun taría bien olvidar los dous comodines: Mapa de Muniellos y Mapa del Alto Sil, tous el.los editaos por Calecha Ediciones.

 Muitas felicidades, ya muitas gracias, a los autores ya a Calecha por descubrinos lo nueso, aquel.lo que ta ahí, que nun vemos, que nun-l.ly damos la importancia que tien ya que yía la mayor achalga de la nuesa tierra. Ya que sigan asina por muitu tiempu.