Hasta siempre, Antonín

Yía ésta outra d'esas entradas que nun imaxinéi tener qu'escribir nin tampoucu quería faela. Esti xueves pasáu morrióu en La Viliel.la Antonio Álvarez Ramón, de casa de Corbella, na mesma casa na que naciera hai 52 años. Cumu muita xente del pueblu, Antonio marchóu de La Viliel.la conos sous padres ya harmanos buscando amechorar la vida. Dispuéis de muitos anos en Madrid, diénon-l.ly el retiru por enfermedá. Ya, entoncias, decidióu hai trés anos regresar al pueblu ya esfrutar ail.lí de la xubilación.

Yera Antonio un auténticu mañosu pa trabayar la madera: faía miniaturas d'aladros, engazos ya outras ferramientas. Fixera tamién, entre outras cousas, un molín a escala que punxo na fonte de La Oul.lera, ya que funcionaba cona augua que salía del l.lavadeiru, ya axeitara del.las fontes.

Siempre paez que, cuando muerre una persona, tou son alabancias. Antonio nun yera perfeutu: naide lu yía. Peru yera una persona a la que costaba velu enfadáu con dalguién. Ya si s'enfadaba, nun-l.ly duraba muitu tiempu nin yera rencorosu. Siempre taba dispuestu a echar una manu a cualquier vecín, ensin qu'houbiera que pedí-l.lylu ou insistí-l.ly. Tenía tamién una voz increyible ya un gran estilu pa la canción asturiana, al igual que'l sou harmanu Óscar: venía-l.lys pola parte la sua madre ya la sua buela materna.

La sua voz silencióse pa siempre esti 14 d'abril del 2011. Ya nun podréi escuitar desde casa d'El Xastre, cuandu él taba na cocina la sua casa, esos cantares que tantu-l.ly prestaba echar. Nin compartir más bonos momentos polas fiestas de los pueblos cercanos ou tando de filandón en dalguna casa del l.lugar. Nin recibir la sua visita, casi siempre la primera, al chegar a la mia casa.

Dicía qu'Antonio nun yera rencorosu. Peru you sí. Estu nun te lo perdono, Antonín, que te marcharas d'esta manera ya tan ceu. Ya nun merecías esti final pa la tua vida. Ouquiera que teas, vecín, amigu, pariente, compañeiru, nun t'esqueiceréi enxamás.

Síate la tierra l.lixera.