Rutas prohibidas (I): Camín de La Veiga

 

Ruta completa

Teo intención de poner no blogue una serie de rutas pol monte de La Viliel.la pa quienes, por motivos varios, nun pueden faelas ya asina conozan un poucu la cara oculta de Muniel.los. Anque nun yía que sían prohibidas sólu por causas l.legales ou por tener muita cuesta: tamién polo dificil que yía andar pola mayoría d'el.las, tal cumu tán los caminos ya siendas.
Estas entradas nun tendrán una frecuencia fixa, sinón que saldrán a rataos, a imaxe ya asemechanza de las neuronas del autor. Esta primera que presento güei  nin siquiera ta entera -prometo correxir esta falta n'outra ocasión-, por falta de tiempu ya d'una bona fouz...

En el Chanu La L.lera

Nun van muitos meses entrugábame nuna entrada d'esti blogue cuál sería'l destín de los 200.000 € que taban presupuestaos pa diversas actuaciones na Reserva de Muniel.los, ya más concretamente pola parte (53.188 €) que taba prevista pa la l.limpieza de caminos ya sendeiros. Pues bien, mientras escribía esas l.linias, taba siendo rozáu -yá lu fora cuandu se publicóu la entrada- el camín que vei a La Veiga, onde ta (ou, michor dichu, taba) la braña de La Viliel.la, conos restos de lu que fonon las cabanas ya de las trousas pa la facienda. Esta Semana Santa quixi esfrutar d'esi paséu ya'l Domingu'i Pascua, con una mañana realmente bona, púnxeme a el.lu.

Fonte d'El Col.láu d'Arriba

Al escomenzar el viaxe nun podía creyelu... Nun sólu taba l.limpiu'l camín. Tamién axeitaran del.las fontes que tán nél, poniéndo-l.lys un canaleichu de madera, feitu d'una cana abuecada, pa poder beber. La primera, la fonte d'abaxu d'El Col.láu, a 800 metros de La Viliel.la. Bien yía verdá que nun yera'l sitiu orixinal: en realidá, la fonte taba por detrás ya tenía un pozu pal ganáu, anque'l sendeiru que vei pa el.la nun se véi pol bardal que lu cubre. De tólas maneras, la fonte quedóu muitu guapa. La fonte d'El Col.láu d'Arriba, unos poucos metros más arriba, yá fora bien arreglada unos anos anantias por Antonio, de que'i Corbella, ya asina continúa.

Fonte d'El Col.láu d'Abaxu

En la Granda L'Antigua

Sigo la ruta desde las fontes hasta xubir a El Col.láu. El camín, por encima de la Granda L'Antigua, ta cumu una autopista. Los que tuviestis ail.lí el día del V Alcuentru del L.lonxanu Oeste nun seríais a reconocelu. Parada en Xentiles. El remexu que salía aiquí yía agora una fonte axeitada d'una forma asemeichada a la d'El Col.láu d'Abaxu. Nunca houbo aiquí nada preparáu pa beber, yá que la fonte de Xentiles naz unos metros por baxu'l camín que vei a El Garabal ya varias decenas de metros por encima'l  camín que sigo, ya aiquí abaxu yía una augua mui gorda al paladar.      

Xentiles

En Val.lina Seca hai una zreizal atravesada no camín que nun pudienon quitar, peru que xente áxil cumu you puede saltar ensin problema... El camín sigue en bonas condiciones pola Fonte'l Miel.

Val.lina Seca

La Fonte'l Miel

N'El Talameiru

Chego a El Talameiru (¡coime, paez qu'aiquí hai un cachín ensin l.limpiar..!) Peru nun yía un cachín. Desde esti l.lugar lu que foi un camín de carru yía un sendeiru sólu aptu pa cabras, cabreiros ya outros seres montunos ya andarinos, ya lu únicu que ta rozáu yía lu que fixenon del.los vecinos pa poder achegase hasta los praos que tán 500 metros más alantre. La cabana que ta a la vera'l camín nin siquiera se véi.

Apartando xiniestas ya uces consigo siguir hasta la fonte de Papal.leiru, que no branu malapenas dexa que se pueda beber un tragu al ras de suelu. Agora tampoucu pué bebese... polo contrariu. Remanez tal cantidá d'augua que fai que'l camín se convierta nun minirregueiru durante 30 metros. Hai augua por tólos sitios ya'l regueiru La Porquera (tamién chamáu de L'Aviséu), a la altura de los praos de La Pasada produz un espectáculu impresionante a la vista ya al oyíu.


Yía hora de volver pa casa, non ensin dexar de visitar de cerca'l cortín d'El Talameiru, casi enteiru a nun ser la parte ou taba la puerta.

Cortín d'El Talameiru

El camín en Papal.leiru

Regueiru La Porquera en La Pasada

Nun séi por quéi nun se rozóu'l camín hasta La Veiga, que ta a unos 1.300 metros del sitiu onde dexanon el l.labor. Bien yía verdá que nos días que lu fixenon chovióu a fartar (ya l.lueu vieno la nieve), ya podía ser un bon motivu. Peru'l casu yía que dispuéis nun volvióu naide, si ésa foi la causa. Da la impresión de que yía cumu siempre: un paisanu nun despachu de Cangas ou d'Uviéu, (¿qué más da?, pa nós tán igual de l.lonxe) diz qu'hai que rozar 2,5 km de caminos no monte de La Viliel.la, partiendo desde'l pueblu, chegue onde chegue, ya esu foi lu que fixo la empresa encargada del l.labor. Nun cabe duda de que, en La Viliel.la, tou lo que tocan las alministraciones públicas, ou queda mal feitu ou queda feitu a medias, que vien a ser paecíu. ¿Por qué será que yá nun yía una sorpresa?

(A Antonín, que nos dexó un día cumu güei de 2011)