Pontífices

Paezme que nun vou falar de relixón, anque tea tan recién l'arrenunciu'l Papa... Peru esi títulu bien lu merecen, no sou sentíu etimolóxicu, los vecinos de la parroquia de L.larón, que, fartos de ver que nengún organismu públicu-l.lys faía casu nas súas peticiones, punxénonse manos a la oubra p'acabar con una situación que yá s'al.largaba desde faía nueve anos.

La Ponte no 1997

Cono cenciel.lu nome de La Ponte conozse el pasu que xune las dúas ouriel.las del ríu Ibias nos términos de La Viliel.la, na zona de Muruecos. Tien un vanu de 12 metros ya una altura d'outros 12 hasta'l fondu'l ríu. Nun hai memoria del tiempu que l.leva feita, anque yía de suponer que'l pasu por este l.lugar vien de mui antiguu, pues nun había outru más axeitáu pal pasu de personas ya cargas desde las fincas que tán na marxen izquierda del Ibias, ya yera el pasu del Camín Real que, desde Trabáu ya Astierna, yiba pa Cangas.

Anu 2000

Tuvo siempre la mesma estructura: cincu vigas de castañal, tablas pal pisu ya outru par de vigas a cada l.lau, encima las tablas, pa faer de contrapesu a estas ya tamién a mou de barandiel.las. Foi iguáu varias veces, yá que las tablas ya las vigas espuestas a la intemperie apodrecían ya yera necesariu sustituyilas por outras nuevas. D'estos trabachos encargáronse siempre los vecinos de la parroquia, inclusu dispuéis de que'l monte de La Viliel.la fora propiedá del Principáu. Nos cabeiros años pidióse al Principáu que fora reparáu o feitu de nuevu, yá que l'estáu no que taba faía peligrosu el tránsitu de vehículos por él, ya que correspondía-l.lys faelu cumu propietarios del monte ya ser un camín públicu.

No anu 2000, partiéronse las cabezas de dúas de las vigas. La Ponte quedóu inclinada pal l.lau d'arriba, viniendo desde La Viliel.la, ya féxose peligrosu, amás del pasu con vehículos, el de personas, pues las tablas movíanse al pasu, ya cabía la posibilidá de cayer al ríu con consecuencias tráxicas.

Encofráu de las cabezas de la ponte (2009)

Varias veces foi solicitáu al Principáu ya'l Ayuntamientu l'arreglu de la ponte, ya outras tantas foi denegáu conas sidas más diversas ya pelegrinas: “Nun hai presupuestu”, “Yía cousa del Principáu”, “Esvióuse'l fondu pa outras obras urxentes”, “Nun se acompaña proyeutu de la obra”,“A ver si pal añu que vien podemos disponer d'una partida presupuestaria”, etc. Nun-l.lys valienon tampoucu las razones d'urxencia que fonon espuestas no escritu enviáu no anu 2002, nas que se dexaba claru que'l pasu pola ponte, nas condiciones que se faía, nun yera seguru tampoucu pa los vehículos de vixilancia del Principáu ya'l Seprona, ou, en casu d'incendiu, los de bombeiros. Asina ya tóu, los poucos vecinos que entovía tenían ganáu ya gadañaban los praos, pasaban por el.la, ya tamién dalgunos osaos ya osadas que, con dispreciu pol peligru o simple desconocimientu, cruciaban d'un l.lau pal outru.

El nuevu pisu (2009)

Nos cabeiros meses del 2008, viendo que nin Principáu nin Ayuntamientu taban dispuestos a faer nada, los vecinos de la parroquia punxenónse manos a la oubra ya cortaron la madera necesaria pa las vigas ya las tablas. No mes d'agostu del 2009, ya esta vez, con aporte de dalgunos materiales por parte l'Ayuntamientu (grava, cementu ya una carroceta pa trasportar ya colocar las vigas), quedóu feita una nueva ponte. La obra foi rematada n'agostu del 2010 cona colocación d'unos zarramientos de postes de madera a los l.laos, que tamién facilitóu l'Ayuntamientu. El Principáu apaecióu namás pa comprobar si punxéramos dalgún material que nun tuviera integráu no entornu, ya paez que marchanon entornaos (*) al ver que taba feita de madera ya quedara guapa dafeitu.

La Ponte, no 2010

Que todos (vecinos ya visitantes), esfrutéis ensin peligru pa la vuesa integridá física d'un trabachu bien acabáu ya d'un paséu mui guapu. Peru tenéi en cuenta que'l paséu pola Zona Prohibida puede costavos una farracada d'euros...

(*) Entornáu: Enfadáu, enfocicáu (Diccionariu de l'Academia de la L.lingua Asturiana, 7ª aceición)